तुलसीपुर उपमहानगरद्वारा अग्निपीडितलाई राहत दिने निर्णय

काठमाडौं - आगलागीको घटनामा परी ज्यान गुमाएका दुई जनाका परिवारलाई तुलसीपुर उपमहानगरपालिकाले जनही दुई लाख रुपैयाँ राहत उपलब्ध गराउने निर्णय गरेको छ।उपमहानगरको आज बसेको ४८औँ कार्यपालिका बैठकले विपद् राहत कोषबाट अग्निपीडित परिवारलाई उक्त रकम प्रदान गर्ने निर्णय गरेको हो।

नगर प्रमुख टिकाराम खड्काको अध्यक्षतामा बसेको बैठकले गत पुस २८ गते आगलागीमा परी ज्यान गुमाएकी तुलसीपुर–१ भमके निवासी ७६ वर्षीया रिमा देवकोटाको परिवार र गत चैत १२ गते आगलागी घटनामा परी ज्यान गुमाएकी तुलसीपुर ७ मोतिपुर निवासी ७२ बर्षिया गुमीकुमारी पौडेलको परिवारलाई जनही दुई लाख रुपैयाँ राहत उपलब्ध गराउने निर्णय भएको कार्यालयले जनाएको छ । साथै बैठकले केही समयअघि परेको असिना–पानीका कारण तरकारी खेतीमा क्षति व्यहोरेका किसानलाई समेत राहत प्रदान गर्ने निर्णय गरेको छ।