पोखरा बसपार्कका सुकुम्बासीलाई दलहरूको आडभरोसा

पोखरा बसपार्कमा रहेका भूमिहीन तथा सुकुम्बासीलाई घर–टहरा छाड्न भन्दै पोखरा महानगरपालिकाले निकालेको ३५ दिने सार्वजनिक सूचनाको म्याद सकिन अब जम्मा ४ दिन बाँकी छ। महानगरले पोखरामा बनेका अनधिकृत घर–टहरा हटाउन भन्दै वैशाख पहिलो साता ३५ दिने सूचना निकालेको थियो। सो सूचनाको म्याद यही जेठ ८ गते सकिँदैछ।

तर पोखरा बसपार्कका भूमिहीन तथा सुकुम्बासीले तत्काल बसोबासको स्थान नछाड्ने बताएका छन्। भूमिहीन तथा अव्यवस्थित बसोबासी सरोकार समिति बनाएका उनीहरू वैकल्पिक व्यवस्था नभएसम्म सो स्थान नछाड्ने अडानमा छन्। ३५ दिने सूचनाको म्याद सकिएको भोलिपल्ट जेठ ९ गतेदेखि डोजर चल्ने हो कि भन्ने त्रासमा रहेका उनीहरूलाई कास्कीका पुराना राजनीतिक दलहरूले अडभरसा दिइरहेका छन्। पोखरा महानगरपालिकाले आयोजना गरेको सर्वदलीय छलफलमा समेत वैकल्पिक व्यवस्था नगरी भूमिहीन तथा सुकुम्बासीलाई नहटाउन दबाब दिएका उनीहरूले स्थानीय सुकुम्बासीलाई आफैं नछाड्न भनिरहेका छन्।