एथलेटिक्समा तीनवटा राष्ट्रिय जुनियर कीर्तिमान

छात्र चार गुणा चार सय मिटरमा गण्डकी प्रदेशले स्वर्ण जितेसँगै १६औं केन्द्रीय राष्ट्रपति रनिङ सिल्ड खेलकुद प्रतियोगिताअन्तर्गत एथलेटिक्समा कुल तीनवटा जुनियर राष्ट्रिय कीर्तिमान बनेका छन्।

त्रिपुरेश्वरस्थित दशरथ रंगशालामा बिहीबार भएको छात्र चार गुणा चार सय मिटर रिलेमा गण्डकीको टोली (अतित थापा, आर्यन रानामगर, अंकित रानाभाट र सुदीप भण्डारी सम्मिलित) ले नयाँ जुनियर राष्ट्रिय कीर्तिमान कायम गरेको छ । यो टोलीले निर्धारित दूरी तीन मिनेट २७.९ सेकेन्डमा पार गरेको हो । यसअघि तीन मिनेट ३०.९ सेकेन्डको कीर्तिमान बागमती प्रदेशका प्रवीण रानामगर, हस्त सुनार, नीरज शाह र सन्तबहादुर दराईको नाममा थियो । उक्त कीर्तिमान गत संस्करणमा बनाएको हो । यसअघि बागमतीका अविनाश सुनारले हाईजम्पमा र भगवती खड्काले चार सय मिटर दौडमा जुनियर राष्ट्रिय कीर्तिमान बनाएका थिए । एथलेटिक्समा कुल २६ वटा विधामा प्रतिस्पर्धा हुँदै छन्।