लम्कीचुहा घटनामा चिकित्सक संघको कडा चेतावनी, कारबाहीको माग

काठमाडौं - कैलालीस्थित लम्कीचुहा प्रादेशिक अस्पतालका निमित्त मेडिकल सुपरिटेन्डेन्ट डा. कमलेश प्रसाद यादवमाथि लम्कीचुहा नगरपालिकाकी नगरप्रमुख सुशिला शाहीले अपशब्द प्रयोग गर्दै गालीगलौज, अपमान तथा धम्की दिएको घटनाप्रति नेपाल चिकित्सक संघले गम्भीर आपत्ति जनाएको छ।

संघले शुक्रबार विज्ञप्ति जारी गर्दै स्वास्थ्य क्षेत्रमा निरन्तर सेवामा खटिएका चिकित्सकमाथि भएको यस्तो अमर्यादित र निन्दनीय व्यवहारको घोर भर्त्सना गरेको छ। नगरप्रमुखजस्तो जिम्मेवार सार्वजनिक पदमा रहेको व्यक्तिबाट पदीय मर्यादाविपरीत गरिएको व्यवहारले चिकित्सक मात्र नभई समग्र स्वास्थ्य क्षेत्रकै सम्मानमाथि आघात पुगेको संघको ठहर छ।