ओली–प्रचण्डको ‘सरप्राइज’ सत्ता सहकार्य, धोकाधडी राजनीतिको पुनरावृत्ति

काठमाडौँ । नेकपा एमालेका अध्यक्ष केपी शर्मा ओली र नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ बिच सत्ताका लागि ‘सरप्राइज’ (अप्रत्याशित) सहकार्यको शृङ्खला जारी छ । वैचारिक र सैद्धान्तिक रूपमा विपरित ध्रुवमा उभिएका ओली–प्रचण्डले २०७२ साल असोज २५ गते पहिलो पटक सत्ता सहकार्य गरेका थिए ।

त्यतिबेला ओलीलाई प्रधानमन्त्री बनाउन प्रचण्डले नै प्रस्ताव गरेका थिए । त्यसयता ११ वर्षमा ओली र प्रचण्डबिच पाँच पटक सत्ता सहकार्य भइसकेको छ । ओली चार पटक देशको प्रधानमन्त्री बने । प्रचण्ड तीन पटक प्रधानमन्त्री बनिसकेका छन् । प्रचण्डको प्रस्तावमा ओली दुई पटक प्रधानमन्त्री बन्न सफल भए । ओलीको प्रस्तावमा प्रचण्ड दुई पटक(२०८० साल फागुन २१ गते सत्ता निरन्तरता समेत) प्रधानमन्त्री बनेका थिए ।