पूर्वाधार विकासमा गुणस्तर र नैतिकतामा सम्झौता नगर्न मन्त्री श्रेष्ठको निर्देशन

ऊर्जा, जलस्रोत तथा सिँचाइ मन्त्री विराज भक्त श्रेष्ठले राष्ट्रको समृद्धि, दिगो पूर्वाधार विकास र प्रभावकारी सार्वजनिक सेवा प्रवाहका लागि दक्ष, इमानदार तथा उत्तरदायी इन्जिनियरहरूको भूमिका निर्णायक हुने बताएका छन्। जल तथा ऊर्जा आयोगको सचिवालय अन्तर्गतको जलस्रोत तथा ऊर्जा अनुसन्धान केन्द्रद्वारा आयोजित नवप्रवेशी युवा इन्जिनियरहरूको तालिम कार्यक्रमलाई सम्बोधन गर्दै उनले सरकारी सेवामा प्रवेश केवल जागिरको सुरुआत नभई राष्ट्र निर्माणको अभियानमा समर्पित हुने महत्वपूर्ण अवसर भएको उल्लेख गरे।

मन्त्री श्रेष्ठले अब नवप्रवेशी इन्जिनियरहरू केवल प्राविधिक जनशक्ति नभई राष्ट्रसेवकको भूमिकामा रहेको बताउँदै प्रत्येक निर्णय, प्राविधिक सुझाव, हस्ताक्षर र कार्यले लाखौँ नागरिकको जीवनमा प्रत्यक्ष प्रभाव पार्ने भएकाले उच्च जिम्मेवारीबोधका साथ काम गर्नुपर्नेमा जोड दिए। उनका अनुसार कुनै पनि राष्ट्रको विकास, सभ्यता र समृद्धि इन्जिनियरहरूको सिर्जनशीलता, अनुसन्धान, अनुशासन र अथक परिश्रमसँग जोडिएको हुन्छ।