सूक्ष्म, साना तथा मझौला उद्यमलाई जोखिमबाट जोगाउन बीमा विस्तार आवश्यक, पहुँच र लागतमा सुधार गर्न यूएनडीपीको सुझाव

काठमाडौं । नेपालका सूक्ष्म, साना तथा मझौला उद्यम (एमएसएमई) क्षेत्र विभिन्न जोखिमको उच्च चपेटामा रहे पनि बीमा पहुँच कमजोर रहेको एक अध्ययनले देखाएको छ । प्राकृतिक विपद्, जलवायु परिवर्तन, व्यवसाय अवरोधलगायतका जोखिमबाट उद्यमलाई सुरक्षित राख्न बीमालाई वित्तीय उत्पादनका रूपमा मात्र नभई व्यवसाय निरन्तरता र आर्थिक उत्थानशीलताको आधारका रूपमा विकास गर्नुपर्ने अध्ययनले औंल्याएको छ।

संयुक्त राष्ट्रसङ्घीय विकास कार्यक्रम (यूएनडीपी) नेपाल र नेपाल बीमा प्राधिकरणले सोमबार सार्वजनिक गरेको ‘रिस्क म्यानेजमेन्ट इन नेपाल्स एमएसएमईजः द इन्स्योरेन्स प्रोटेक्सन ग्याप’ अध्ययन प्रतिवेदनले नेपालका साना तथा मझौला व्यवसायमा बीमा संरक्षणको ठूलो अन्तर रहेको देखाएको हो ।