बाजुरा र हुम्लाको सिमानामा प्रहरी र सशस्त्रको अस्थायी बेस राख्ने निर्णय

काठमाडौँ । बाजुरा र हुम्लाको सीमा विवाद नटुङ्गिएसँगै सो क्षेत्रमा केन्द्रीय संयुक्त सुरक्षा बेस राख्ने निर्णय गरिएको छ । शुक्रवार गृह मन्त्रालयमा बसेको केन्द्रीय सुरक्षा समितिको बैठकले दुई जिल्लाको सीमा स्थित बाजुराको हिमाली गाउँपालिका वडा नम्बर–३ लाम्पाटामा नेपाल प्रहरी र सशस्त्रको ‘केन्द्रीय संयुक्त सुरक्षा बेस’ राख्ने निर्णय गरेको हो । गृहमन्त्री सुधन गुरुङको अध्यक्षतामा बसेको बैठकमा ३ सुरक्षा निकायका प्रमुखहरू र सेनाका प्रतिनिधि सहभागी थिए ।

बैठकमा सहभागी गृह मन्त्रालयका एक जना अधिकृतका अनुसार सुरक्षा बेस राख्ने गरी सुदूरपश्चिम प्रदेशबाट प्रहरी र सशस्त्रको टिम त्यसतर्फ पठाइएको छ । ती अधिकृत भन्छन्– ‘सुरक्षाकर्मीलाई आवश्यक बन्दोबस्तीको सामान हेलिकप्टरबाट पठाउने निर्णय भएको छ ।’