‘अन्तिम मौका’ भन्दै ट्रम्पद्वारा वार्ताको दाबी : इरानद्वारा सिधै अस्वीकार

अमेरिका र इरानबिचको तनाव फेरि चुलिएको छ। अमेरिकी राष्ट्रपति डोनाल्ड ट्रम्पले इरानसँग वार्ता भइरहेको र यो तेहरानका लागि पाँच महिनादेखि जारी युद्ध अन्त्य गर्ने ‘अन्तिम मौका’ भएको दाबी गरेका छन्। तर इरानले भने अमेरिकासँग कुनै पनि प्रत्यक्ष वार्ता नभएको प्रस्ट पार्दै यो दाबीलाई सीधै अस्वीकार गरेको छ।

राष्ट्रपति ट्रम्पले पत्रकारहरूसँग कुरा गर्दै इरानलाई सम्झौतामा पुग्नका लागि ‘अन्तिम मौका’ दिएको बताएका छन्। उनले भने, ‘म उनीहरूलाई शिर काट्नुअघि अन्तिम मौका दिन चाहन्छु।’ ट्रम्पका अनुसार इरानी अधिकारीहरूले नियोजित सैन्य कारबाहीको सुइँको पाएपछि सीधै फोन गरेका थिए। उनले थपे, ‘आशा छ तिनीहरू होसमा आउनेछन्। त्यसैले उनीहरूले मलाई बोलाए, र भने- कृपया आक्रमण नगर्नुहोस्। हामी सम्झौता गर्नेछौं। वास्तविक सत्य यही हो।’ साथै खाडी सहयोगीहरू (साउदी अरेबिया, संयुक्त अरब इमिरेट्स र कतारलगायत) को आग्रहमा आफूले इरानविरुद्धका ठूला आक्रमणहरू हाललाई स्थगित गरेको पनि उनले बताए। ट्रम्पले यसलाई दोस्रो विश्वयुद्धपछिको सबैभन्दा ठूलो आक्रमण हुनसक्ने दाबी गरेका थिए।