कांग्रेसको नयाँ मापदण्ड : सांसदका स्वकीय नियुक्तिमा स्नातक उत्तीर्ण अनिवार्य

नेपाली कांग्रेस संसदीय दलले सांसदका स्वकीय सचिव (पीए) नियुक्तिको लागि नयाँ कार्यविधि ल्याएको छ। कार्यविधि अनुसार संघीय संसद्का प्रतिनिधिसभा र राष्ट्रियसभाका सांसदका स्वकीय सचिव (पीए) नियुक्तिलाई व्यवस्थित, पारदर्शी र गुणस्तरीय बनाउन नयाँ ‘प्रतिनिधि सभा र राष्ट्रिय सभा सदस्यका लागि स्वकीय सचिव नियुक्ति सम्बन्धी कार्यविधि, २०८३’ संसदीय दलको बैठकले पारित गर्दै तत्काल लागू गर्ने निर्णय गरेको हो।

नयाँ कार्यविधिअनुसार स्वकीय सचिव बन्नका लागि कम्तीमा स्नातक तह उत्तीर्ण गरेको हुनुपर्ने व्यवस्था गरिएको छ। कानून, राजनीति शास्त्र, अर्थशास्त्र, सार्वजनिक प्रशासन, पत्रकारिता, आमसञ्चार, सूचना प्रविधि, कृषि, इन्जिनियरिङ, स्वास्थ्य तथा व्यवस्थापन विषय अध्ययन गरेका उम्मेदवारलाई प्राथमिकता दिइनेछ। साथै, उम्मेदवारको उमेर न्यूनतम २१ वर्ष पुगेको हुनुपर्ने प्रावधान पनि राखिएको छ।