परासी बसपार्क चार वर्षदेखि बेवारिसे, पहुँच मार्ग नहुँदा सञ्चालनमा सकस

पश्चिम नवलपरासीको सदरमुकाम परासीमा सरकारी लगानीमा निर्माण गरिएको आधुनिक बसपार्क झण्डै चार वर्षदेखि प्रयोगविहीन बनेको छ। निर्माण सम्पन्न भइसके पनि बसपार्कसम्म पुग्ने उपयुक्त सडक नहुँदा यो संरचना “सेतो हात्ती” जस्तै खाली छ।

बसपार्क सञ्चालनमा नआउँदा सवारी साधनहरू अहिले पनि मुख्य सडकको किनारमा पार्किङ गर्न बाध्य छन्, जसले बजार क्षेत्रमा ट्राफिक जाम र दुर्घटनाको जोखिम बढाएको छ। करिब चार करोड रुपैयाँ लगानीमा निर्माण भएको बसपार्कमा टर्मिनल भवन र व्यावसायिक सटरहरू निर्माण भइसकेका छन्। तर, करोडौँको यो संरचना अहिले घाँसे मैदान र झाडीमा परिणत हुन थालेको छ।