रवीन्द्र मेहताको शव बुझ्न परिवारको इन्कार: गृहमन्त्री नै आउनुपर्ने अडान

काठमाडौँ। सुनसरीको देवानगञ्ज गाउँपालिका–३ कप्तानगञ्जमा प्रहरीको गोलीबाट गम्भीर घाइते भई उपचारका क्रममा काठमाडौँमा मृत्यु भएका २२ वर्षीय रवीन्द्र मेहताको शव परिवारले नबुझ्ने अडान लिएका छन्। त्रिवि शिक्षण अस्पतालमा मंगलबार बिहान निधन भएका मेहताको परिवार र आफन्तले सरकारसँग औपचारिक सम्झौता नभएसम्म शव संकलन नगर्ने र अन्त्येष्टिमा सहभागी नहुने स्पष्ट पारेका हुन्।

अस्पताल परिसरबाट प्राप्त विवरणअनुसार मृतकका आफन्त र परिवारका सदस्यहरू शिक्षण अस्पतालको आईसीयू कक्षबाहिर भेला भई निरन्तर दबाब दिइरहेका छन्। उनीहरूले स्वयं गृहमन्त्री उपस्थित भई आफ्ना मागहरू सम्बोधन गर्नुपर्ने सर्त अघि सारेका छन्। अस्पताल प्राङ्गणमा स्थानीय तथा आफन्तहरूको उपस्थिति थप बाक्लो बन्दै गएको छ भने सरकारसँग ठोस सहमति नभएसम्म फर्किएर नजाने अडान उनीहरूको छ।