बाढीले विद्यालय भत्कायो, विद्यार्थी चौरमा पुगे

१९ साउन, हुम्ला । गत ५ जेठमा हुम्लाको चंखेली गाउँपालिका–५ नेप्का गाउँमा रहेको डाँफे आधारभूत विद्यालयमा बाढी पस्यो । बाढीले विद्यालय भवन भत्कायो । कक्षा कोठा क्षतविक्षत भए । त्यसपछि विद्यार्थीहरू खुला चौरमा पढ्न बाध्य भए ।

बाढीले क्षति पुर्‍याएको विद्यालय अहिलेसम्म पुनर्निर्माण हुन सकेको छैन । विद्यालयका भवनहरू क्षतबिक्षत देखिन्छन् । स्थलगत रिर्पोटिङका क्रममा नेप्का पुग्दा ८० जना विद्यार्थीहरू हातमा कापी–किताब समातेर त्रिपाल लगाइएको चौरमा पढ्दै थिए ।