ग्यास अभावबारे सरकारको चासो, मासिक ५० हजार मेट्रिक टनभन्दा बढी आयात गर्ने निर्णय

काठमाडौं । बजारमा खाना पकाउने एलपी ग्यासको अभाव देखिन थालेपछि सरकारले समस्या समाधानका लागि सरोकारवालासँग छलफल गरी आपूर्ति व्यवस्थापनलाई थप प्रभावकारी बनाउने निर्णय गरेको छ । साथै, आगामी तीन महिनासम्म प्रत्येक महिना ५० हजार मेट्रिक टनभन्दा बढी एलपी ग्यास आयात गर्ने व्यवस्था मिलाइने भएको छ ।

प्रधानमन्त्री तथा मन्त्रिपरिषद्को कार्यालय, सिंहदरबारमा मुख्य सचिव गोविन्दबहादुर कार्कीको अध्यक्षतामा मंगलबार भएको बैठकमा ग्यास अभावको कारण, आपूर्ति व्यवस्थापन र समाधानका उपायबारे सम्बन्धित मन्त्रालय, विभाग, नेपाल आयल निगम, ग्यास उद्योगी तथा वितरण व्यवसायीबीच विस्तृत समीक्षा गरिएको प्रधानमन्त्रीको सचिवालयले जनाएको छ ।