जब राज्यले आफ्नै भविष्यलाई अपमान गर्छ!

एउटा राष्ट्रको भविष्य कहाँ निर्माण हुन्छ? के त्यो सिंहदरबारका बैठक कोठामा निर्माण हुन्छ? संसदका भाषणमा? मन्त्रालयका नीति दस्तावेजमा? वा विश्वविद्यालयका दीक्षान्त समारोहमा?

यी सबै प्रश्न महत्त्वपूर्ण छन्। तर इतिहासले बारम्बार प्रमाणित गरेको एउटा गहिरो सत्य के हो भने कुनै पनि राष्ट्रको भविष्यको पहिलो रेखाचित्र कक्षाकोठामा कोरिन्छ। त्यहाँ पाठ्यपुस्तक मात्र पढाइँदैन; त्यहाँ चेतना निर्माण हुन्छ। त्यहाँ नागरिक जन्मिन्छन्। त्यहाँ नै भविष्यका वैज्ञानिक, चिकित्सक, इन्जिनियर, न्यायाधीश, लेखक, कलाकार, प्रशासक र राजनीतिक नेतृत्वका बीउ रोपिन्छन्।