स्वास्थ्य बिमा ‘निल्नु न ओकल्नु’ : सुविधाभन्दा सास्ती बढी

सेती प्रादेशिक अस्पतालमा कम्मरको हड्डीको शल्यक्रिया गराउन आएकी हरिनादेवी ऐरले स्वास्थ्य बिमाको रकमले उपचारमा राहत हुने सोचेकी थिइन्। शल्यक्रिया गर्न अस्पतालमा उनी भर्ना भइन्। शल्यक्रिया गरेको मात्र ७० हजार रुपैयाँको बिल आयो। स्वास्थ्य बिमामा सुविधावापत पाउने एक लाखमध्ये ६४ हजार रुपैयाँ मात्र उनको नाममा बाँकी थियो। ७० हजार रुपैयाँभन्दा कम भएकाले उपलब्ध गराउन नमिल्ने भन्दै उनलाई बिमावापतको सुविधा दिइएनन्।

‘बिमामा बाँकी ६४ हजार रुपैयाँवापतको उपचार सुविधा त मैले पाउनुपथ्र्यो तर दिएनन्। ६ हजार जम्मा गरेर ७० हजार पुर्‍याउँछु, उपचारका लागी बिमाको पैसा दिनु भनेर कति अनुरोध गर्दा पनि पाइएन’, उनले भनिन्, ‘स्वास्थ्य बिमाको रकम नपाएपछि छुट्टै पैसा खोज्नुपर्‍यो।’