प्रकृति, संस्कृति र साहसिक पर्यटनको पर्याय मुदी गाउँ

आँखैअगाडि चाँदीजस्तै टलक्क टल्केका गुर्जा र धवलागिरि हिमाल। भिरालो पाखामा छपक्क छापिएका परम्परागत शैलीका ढुङ्गे घरहरू। गाउँले परिवेश, आत्मीयपन भएका स्थानीयवासी। यस्तैयस्तै विशेषताले भरिएको छ म्याग्दीको धवलागिरि गाउँपालिका–४ स्थित मुदीगाउँ।

मगर समुदायको बाहुल्यता रहेको गाउँ वरपर रहेका हिउँदमा बेँसी र बर्खामा लेक जाने पशुका घुम्ती गोठहरू। चिटिक्क ढुङ्गाले छापिएका चोक र बाटाहरू। घरघरमा कर्नासेमा भुन्ड्याइएका मकैको झुत्ताले वास्तविक गाउँले जीवन र परिवेशको अनुभूति गराएका छन्।