गोरखाका खोल्साबाट हराउँदै पाहा

गोरखा : केही दिनअघि धार्चे— ४ लाप्राकका रिदीलाल गुरुङ र अर्का एकजना साथी पाहा सिकार गर्न खोला खोल्सा चाहारे। विगतमा जस्तै साँझ खाना खाएर रातभरि सिकार गरेर भोलिपल्ट बिहानसम्म एक झोला पाहा ल्याउँला भन्ने योजना थियो, तर यसपटक त्यसो भएन।

उनीहरू पाहा खोज्दै एकदिन पूरै हिँडेर ल्हे खर्क पुगे। पाहा सिकार गरेर फर्कन तीन दिन लागेको उनी बताउँछन्। ‘हामी बिहान घरबाट ६ बजे निस्केर साँझ ६ बजे ल्हेखर्क पुगेका थियौं। ३३ सय मिटर उचाइमा रहेको ल्हेखर्कमा रातभरि सिकार गर्दा थोरैमात्र पाहा भेटियो’, उनले भने, ‘अहिले त पाहा पाइनै छोडेछ। चारपाँच वर्ष अघिसम्म अहिले भेटेकोभन्दा दोब्बर धेरै भेटिन्थ्यो।’ पहिले एक घण्टा हिँडेपछि जताततै भेटिने पाहा अहिले एक दिनको बाटो टाढा जाँदा पनि पाउन मुस्किल भएको उनको भनाइ छ। ‘पहिले १५ सय मिटर उचाइतिर पनि पाहा पाइन्थ्यो। अहिले नपाउने त होइन, तर सानो–सानो त्यही पनि थोरै भेटिन्छ’, उनले भने, ‘३३ सय, ३५ सय मिटर उचाइसम्म पुग्दा पनि एकदम थोरै भेटिँदो रहेछ।’