मधेसमा आँप खेतीकाे क्षेत्रफल बढे पनि उत्पादन घट्यो

जनकपुरधाम । मधेस प्रदेशमा आँप खेतीको क्षेत्रफल विस्तार हुँदै गए पनि यस वर्ष हावाहुरी र रोग–किराको प्रकोपका कारण उत्पादनमा उल्लेख्य गिरावट आएको छ । कृषि विकास निर्देशनालय नक्टाझिज, धनुषाको तथ्याङ्कअनुसार आर्थिक वर्ष २०८२/०८३ मा प्रदेशभर ३२ हजार ५७४ हेक्टर क्षेत्रफलमा आँप खेती गरिएकोमा प्रतिहेक्टर औसत ९.०४ मेट्रिक टन उत्पादकत्व दरका आधारमा २ लाख ९४ हजार ५६७ मेट्रिक टन उत्पादन भएको छ ।

अघिल्लो आर्थिक वर्ष (२०८१/०८२) मा २९ हजार ८८० हेक्टर क्षेत्रफलमा प्रतिहेक्टर ११.४३ मेट्रिक टन उत्पादकत्व दरले ३ लाख ४१ हजार ४४५ मेट्रिक टन आँप उत्पादन भएको थियो । तुलनात्मक रूपमा चालु वर्ष आँप खेतीको क्षेत्रफल २ हजार ६९४ हेक्टरले बढे पनि उत्पादन ४६ हजार ८७८ मेट्रिक टनले घटेको देखिएको छ ।