तीन दिन अघि दुर्घटनामा ज्यान गुमाएकी यमुनाको पोस्टमार्टम अझै भएन

उदयपुरमा सवारी दुर्घटनामा ज्यान गुमाएकी २८ वर्षीया यमुना विश्वकर्माको शव दुर्घटना भएको तीन दिन बित्दासमेत पोस्टमार्टम हुन सकेको छैन। मृतकका परिवार र ट्रक सञ्चालक पक्षबीच सहमति नजुट्दा कानुनी प्रक्रिया अघि बढ्न नसकेको हो।

बिहीबार दिउँसो गाईघाटबाट उदयपुरगढी गाउँपालिका–३ बर्रेतर्फ श्रीमान् यमबहादुर विश्वकर्मासँग मोटरसाइकलमा जाँदै गरेकी यमुना मालवाहक ट्रकसँग ठोक्किँदा घटनास्थलमै मृत्यु भएको थियो। दुर्घटनामा उनका श्रीमान् यमबहादुर गम्भीर घाइते भएका छन्। उनको एउटा हात र दुई वटा करङ भाँचिएको छ भने विराटनगरमा उपचार भइरहेको छ।