डाबर नेपालले ९ अर्ब ६८ करोड रुपैयाँ थप लगानी गर्ने, उद्योगको क्षमता विस्तार र पुँजी वृद्धिमा रि–इन्भेष्टमेन्ट

नेपाली पैसा

काठमाडौं : डाबर नेपालले यहाँका उद्योगहरुमा थप लगानी (रि–इन्भेष्टमेन्ट) गर्ने भएकोछ । कम्पनीले ९ अर्ब ६८ करोड रुपैयाँ रि–इन्भेष्टमेन्ट गर्न लागेको हो । नेपालमा उद्योग विस्तार र पुँजी वृद्धिका लागि यो रकम खर्च हुने डाबर नेपालले जानकारी गराएको छ । यससम्बन्धी सम्झौतामा लगानी बोर्ड र डाबर नेपालबीच सहमतिपत्रमा हस्ताक्षरसमेत भएको छ ।समझदारीपत्रमा लगानी लगानी बोर्डका प्रमुख कार्यकारी अधिकृत सुशील भट् र डाबर नेपालका बिजनेस हेड हरकिरत सिंह बेदीले हस्ताक्षर गरेका छन् ।

उद्योगको क्षमता विस्तार तथा उत्पाद विविधिकरणको लागि बोर्डले गत माघमै लगानी स्वीकृत गरेको थियो । सम्झौतापश्चात डाबर नेपालका बिजनेस हेड बेदीले नेपालमा आर्जित पुँजीको केही हिस्सा उद्योगको क्षमता विस्तार र पुँजी वृद्धिमा लगानी गर्न चाहेको बताए । बोर्डका सीइओ भट्टले डाबरले गरेको थप लगानीले नेपालप्रति बहुर्राष्ट्रिय कम्पनीको विश्वास रहेको पुष्टि गर्ने बताए ।

बोर्डको कार्यालयमा भएको हस्ताक्षर समारोहमा उद्योग, वाणिज्य तथा आपूर्तिमन्त्री तथा बोर्डका सदस्य रमेश रिजालको उपस्थिति थियो । मन्त्री रिजालले डाबर नेपालको पुनः लगानीले लगानीकर्ता माझ ठूलो सन्देश प्रवाहित हुने बताए । साथै, नेपालमा लगानी गर्न चासो राख्ने विदेशी लगानीकर्तालाई समेत सहयोग पुग्ने बताए । नेपालमा लगानी गरिरहेका लगानीकर्ताबाटै सुन्न र यहाँ सञ्चालित व्यवसाय हेरेर उनीहरूले यसबारे निर्णय गर्न सक्ने उनको भनाइ छ ।