इरानमाथि दबाब बढाउँदै अमेरिका र युरोपेली राष्ट्र

इरानले आणविक गतिविधिसम्बन्धी अन्तर्राष्ट्रिय नियम पालना नगरेको भन्दै अमेरिका, बेलायत, फ्रान्स र जर्मनीले इरानको आणविक विषय संयुक्त राष्ट्रसंघको सुरक्षा परिषद्मा पठाउने प्रस्ताव तयार गरेका छन् । प्रस्तावमाथि संयुक्त राष्ट्रसंघको आणविक निगरानी निकायको शासक मण्डलमा छलफल हुन सक्ने कूटनीतिक स्रोतहरूले बताएका छन् ।

इरानले आफ्नो सबै आणविक सामग्री तथा गतिविधिबारे जानकारी दिनुपर्ने र ती सामग्री शान्तिपूर्ण प्रयोजनमा प्रयोग भए नभएको जाँच गर्न अन्तर्राष्ट्रिय निरीक्षकलाई अनुमति दिनुपर्ने व्यवस्था छ । तर, इरानले आणविक गतिविधिसम्बन्धी आवश्यक जानकारी र निरीक्षणमा पर्याप्त सहयोग नगरेको अमेरिका तथा उसका युरोपेली साझेदारहरूको आरोप छ ।