मोदी जलविद्युत्को ठेक्का प्रक्रिया विवादमा, अनुभवको प्रमाणपत्रमा किर्ते गरेको आरोप

काठमाडौँ । विद्युत् प्राधिकरणको सहायक कम्पनी मोदी जलविद्युत् कम्पनीको ठेक्का प्रक्रियामा अनियमितता भएको भन्दै उजुरी परेको छ । कम्पनीले सञ्चालन गरेको अपर मोदी ए र अपर मोदी हाइड्रो परियोजनाको ठेक्काको अवार्ड पाएको कम्पनीले पेस गरेको विड डकुमेन्टमा उल्लेखित अनुभवको प्रमाणपत्र नक्कली भएको भन्दै यस्तो उजुरी परेको हो ।

मोदी जलविद्युत्ले गत महिना स्वीकृत गरेको दुईवटा प्याकेजको टेन्डरको स्वीकृत गरेको थियो । उक्त ठेक्का पाएको एचएनएसी–केईएम जेभीले टेन्डरमा उल्लेखित शर्त पूरा गर्न गलत डकुमेन्ट प्रयोग गरेको दाबीसहित कम्पनीका प्रबन्ध निर्देशकसँग यसको छानबिन गर्न माग गरिएको छ । उक्त निवेदनको बोधार्थ नेपाल प्रहरीको केन्द्रीय अनुसन्धान ब्युरो, सार्वजनिक खरिद अनुगमन कार्यालय, प्रधानमन्त्री कार्यालय, अख्तियार दुरुपयोग अनुसन्धान आयोग र नेपाल विद्युत् प्राधिकरणलाई समेत गराइएको छ ।