शैक्षिक परामर्श क्षेत्रमा प्रहरी छापा पछि त्रास, व्यवसायी-सरकार आमनेसामने

काठमाडौं । काठमाडौं उपत्यका अपराध अनुसन्धान कार्यालयले गत शुक्रबार एकैदिन उपत्यकाभित्रका ९५ वटा शैक्षिक परामर्श संस्था (एजुकेसन कन्सल्टेन्सी)मा छापा मारेपछि व्यवसायीमा त्रास र अन्योल देखिएको छ । दर्ताविना सञ्चालित संस्थालाई लक्षित गर्दै गरिएको उक्त कारबाहीपछि केही स्थानमा व्यवसायीले सटर बन्द गरेका छन् भने कतिपयले पुनः छापा पर्ने आशंकामा कारोबार नै ठप्प पारेका छन् । संस्था सञ्चालनको मापदण्ड, निवेदन दिएर पनि अनुमतिपत्र नपाएको अवस्था र प्रदेशमा दर्ता भएकाहरूको हैसियतजस्ता विषयमा देखिएको अन्योलले यस क्षेत्रमा राज्यले आफ्नो व्यवसायलाई नै नकारात्मक रूपमा हेरिरहेको आशंका व्यवसायीमा बढेको छ ।

यसै सन्दर्भमा बुधबार काठमाडौंमा नेपाल शैक्षिक परामर्श संघ (इक्यान)ले आयोजना गरेको ‘शैक्षिक परामर्श क्षेत्रको नियमन र सुरक्षाः कानुनी प्रक्रिया र संस्थागत सहकार्य’ विषयको अन्तरक्रिया कार्यक्रममा व्यवसायी, प्रहरी तथा शिक्षा मन्त्रालयका अधिकारीहरू आमनेसामने भएका छन् । कार्यक्रममा छापा मार्ने कार्यालयका प्रमुख, काठमाडौं उपत्यका अपराध अनुसन्धान कार्यालयका एसएसपी सन्तोष खड्का, तथा शिक्षा मन्त्रालयको शैक्षिक परामर्श प्रमाणीकरण शाखाका उपसचिव श्री सेमन्त कोइराला सहभागी भएका थिए ।