अर्थमन्त्री भन्छन् -‘अयोग्य लडाकु’ लाई राज्यकोषबाट रकम बाँड्ने निर्णय भएको छैन

काठमाडौ  : अर्थमन्त्री डा. प्रकाशशरण महतले सशस्त्र द्वन्द्वका ‘अयोग्य लडाकु’लाई राज्यकोषबाट रकम बाँड्ने मन्त्रालयबाट हालसम्म कुनै निर्णय नभएको स्पष्ट पारेका छन् । शुक्रबार सिंहदरबारमा सशस्त्र द्वन्द्वका ‘अयोग्य लडाकु’लाई सरकारले जनही दुई लाख रुपैयाँ रकम उपलब्ध गराउन लागेको भन्दै राष्ट्रिय युवा संघ, नेपालको ध्यानाकर्षण पत्र बुझ्दै मन्त्री महतले यस विषयबारे आफू जानकार नरहेको बताए । उनले अर्थ मन्त्रालयबाट हालसम्म यसबारे कुनै निर्णय नभएको पनि स्पष्ट पारे ।

अर्थमन्त्री महतले अयोग्य लडाकु व्यवस्थापनको विषय चालु आर्थिक वर्षको बजेटमा राखिएको भए पनि त्यसबारे अर्थमन्त्रालयबाट रकम बिनियोजनका विषयमा निर्णय नभएको जिकिर गरे । बजेटको व्यवस्थाअनुसार कार्यविधि गृह मन्त्रालयले अघि बढाएको हुनसक्ने भन्दै उनले आफूले मन्त्रालयको जिम्मेवारी सम्हालेपछि कुनै निर्णयमा संलग्न नरहेको र जानकारी पनि बताए । उनले सरकारबाट राज्यको सम्पत्ति दुरुपयोग नहुनेमा ढुक्क रहन पनि आग्रह गरे ।

अयोग्य लडाकुका नाममा राज्यको ढुकुटीबाट पैसा बाँड्न नहुने भन्दै राष्ट्रिय युवा संघ, नेपालले अर्थमन्त्री महतलाई सात बुँदे ज्ञापनपत्र बुझाएको छ । उनीहरूले उक्त निर्णय कार्यान्वयन नगर्न पनि माग गरेका छन् । सशस्त्र द्वन्द्वका अयोग्य लडाकुलाई राहत उपलब्ध गराउनेसम्बन्धी कार्यविधि, २०७९ प्रति गम्भीर ध्यानाकर्षण भएको युवा संघको विज्ञप्तिमा उल्लेख छ ।

रासस