कन्सल्टेन्सी माथिको कारबाहीलाई महासंघले गर्यो स्वागत, सरकारलाई दियो धन्यवाद

काठमाडौं । सरकारले स्वीकृति नलिई सञ्चालन भएका शैक्षिक परामर्श संस्था (कन्सल्टेन्सी)हरूमाथि कानुनी कारवाही प्रक्रिया अघि बढाइएको विषयप्रति नेपाल शैक्षिक परामर्श व्यवसायी महासंघ स्वागत गरेको छ । बुधबार एक विज्ञप्ति जारी गर्दै महासंघले सरकारको उक्त कदमको स्वागत गरेको हो ।

नेपाल सरकारबाट विधिवत् स्वीकृति तथा अनुमति प्राप्त नगरी गैरकानुनी रूपमा सञ्चालन गरिएका संस्थामाथि प्रचलित कानुन बमोजिम गरिएको अनुगमन, अनुसन्धान तथा कारवाही प्रक्रियाप्रति महासंघले पूर्ण समर्थन व्यक्त गर्दै नेपाल सरकारप्रति धन्यवाद समेत ज्ञापन गरेको छ । स्वच्छ, विश्वसनीय, उत्तरदायी तथा मर्यादित बनाउने दिशामा राज्यका सम्बन्धित निकायहरूले चालेका कदमहरूले समग्र शैक्षिक परामर्श क्षेत्रलाई थप व्यवस्थित बनाउन सहयोग पुग्ने महासंघको दाबी छ ।