कर्णाली दुर्घटना : सोनार क्यामरा र चुम्बकसहित १० गोताखोरबाट खोजी सुरु

दैलेख । सुर्खेतबाट कालिकोटतर्फ जाँदै गर्दा कर्णाली राजमार्गको दैलेखस्थित चामुण्डा बिन्द्रासैनी नगरपालिका–७ साङ्गेताडामा दुर्घटना भई नदीमा बेपत्ता भएको फोर्स गाडी र यात्रुहरूको खोजीकार्यका लागि आधुनिक प्रविधिसहितको गोताखोर टोली परिचालन गरिएको छ । असार १८ गते कर्णाली प्रदेश ०२–००१ ख १०५५ नम्बरको गाडी सडकबाट करिब ६/७ सय मिटर तल कर्णाली नदीमा खसेको थियो ।

दुर्घटना लगत्तै सुरु गरिएको उद्धार प्रयास अन्तर्गत सोही दिन घटनास्थलबाट करिब ४ सय मिटर तल भिरमा अड्किएको अवस्थामा एक पुरुषको शव फेला परे पनि गाडी र अन्य यात्रुको अवस्था अझै अज्ञात रहेको छ । नदीको तीव्र बहाव र गहिराइमा खोजी गर्न सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटारबाट विषेशज्ञ टोली घटनास्थल आइपुगेको छ ।