सुखद खबरको पर्खाइमा

बिहानसम्म परिवारसँग फोनमा कुराकानी भइरहेको थियो। घरपरिवारले पनि उनीहरू काममै छन् भन्ने ठानेको थियो। तर यही जेठ १० गते बिहान करिब ८:३० बजेपछि आएको एउटा खबरले बेँसीसहर नगरपालिका–११ का घर्ती परिवारलाई गहिरो पीडामा धकेल्यो, ‘रसुवामा बाढी आएको छ, आयोजनामा कार्यरत राधिका र झपटबहादुरको सम्पर्क टुटेको छ।'

४३ वर्षीया राधिका घर्ती र ४५ वर्षीय झपटबहादुर घर्ती श्रीमान्–श्रीमती हुन्। उनीहरू रसुवास्थित त्रिशूली थ्री ‘ए’ जलविद्युत् आयोजनामा करिब १०–१२ वर्षदेखि कार्यरत थिए। राधिका खाना पकाउने काम गर्थिन् भने झपटबहादुर सुरुङसम्बन्धी काममा खटिन्थे। बाढी आएको दिन बिहानसम्म सबै सामान्य नै थियो। परिवारसँग करिब ८:३० बजेसम्म सम्पर्क भएको थियो। त्यसपछि भने फोन लागेन। झपटबहादुरको मोबाइलको ‘लोकेसन’ पनि बिहान करिब ८:५६ बजेसम्म देखिएको थियो। त्यसपछि लोकेसनसमेत देखिन छाड्यो।