निर्माण क्षेत्रको समस्या तत्काल सम्बोधन नभएको बैंकहरूको एनपीएल अझै बढ्न सक्छ - सीईओ ज्ञावाली

नबिल बैंकका प्रमुख कार्यकारी अधिकृत मनोज ज्ञवालीले सरकारले निर्माण व्यवसायीलाई समयमै भुक्तानी नगर्दा बैंकिङ प्रणालीमा प्रत्यक्ष दबाब परेको बताएका छन् । आइतबार भएको प्रतिनिधि सभाको अर्थ समितिको बैठकमा मौद्रिक नीतिबारे भएको छलफलमा उनले यस्तो बताएका हुन् ।

उनले निर्माण क्षेत्रको समस्या तत्काल सम्बोधन नगरे बैंकहरूको खराब कर्जा (एनपीएल) अझ बढ्न सक्ने चेतावनी ज्ञावालीको थियो । बैंक तथा वित्तीय संस्थाहरूको निर्माण क्षेत्रमा करिब ५ खर्ब रुपैयाँ कर्जा लगानी रहेको उनले बताए । सरकारले सम्पन्न भएका आयोजनाको भुक्तानी समयमै नगर्दा निर्माण व्यवसायी आर्थिक संकटमा परेको र त्यसको असर बैंकिङ प्रणालीमा देखिन थालेको उनले बताए । उनका अनुसार निर्माण व्यवसायीले काम सम्पन्न गरे पनि भुक्तानी नपाउँदा ऋण नियमित रूपमा तिर्न नसक्ने अवस्था सिर्जना भएको छ, जसले बैंकहरूको कर्जा गुणस्तरमा नकारात्मक प्रभाव पार्न सक्छ ।