स्वास्थ्य बिमामा घट्दो नवीकरण : बिमित ५६ लाखमा सीमित

नागरिकलाई गुणस्तरीय स्वास्थ्य सेवा उपलब्ध गराउने उद्देश्यले सञ्चालन गरिएको स्वास्थ्य बिमा कार्यक्रममा यस वर्ष नवीकरण गर्ने बिमितको संख्या घटेको छ। चालु आर्थिक वर्षमा ५६ लाख ११ हजार ५ सय ५७ जनाले मात्र स्वास्थ्य बिमा नवीकरण गरेका छन्, जुन गत वर्षको तुलनामा कम हो।

स्वास्थ्य बिमा कार्यक्रम सुरु भएदेखि हालसम्म कुल १ करोड ७ लाख ६ हजार ३ सय ९४ जना अर्थात् कुल जनसंख्याको ३७ प्रतिशत नागरिक कम्तीमा एकपटक स्वास्थ्य बिमामा आबद्ध भएका छन्। तीमध्ये सक्रिय बिमितको संख्या ६८ लाख ४१ हजार ७ सय ५९ अर्थात् कुल जनसंख्याको २३ प्रतिशत रहेको स्वास्थ्य बिमा बोर्डले जनाएको छ।