परराष्ट्रमन्त्रीका १०० दिन : केही ‘लुज टक’, केही गम्भीर पहल, के भन्छन् पूर्वपरराष्ट्रमन्त्रीहरू ?

वालेन्द्र शाह 'बालेन' नेतृत्वको सरकारमा कम विवादमा आउने र कार्यसम्पादनमा कम आलोचित हुनेमा राष्ट्रिय स्वतन्त्र पार्टी (रास्वपा)का संस्थापक नेताहरू छन् । त्यसमा एक हुन् परराष्ट्रमन्त्री शिखिर खनाल । खनालको परराष्ट्र मन्त्रालयले १०० दिने सफलता भनिएका ३५ बुँदामा परराष्ट्र मन्त्रालयले सुरु गरेको ‘मोफा मित्र’ नामक एपदेखि इन्टर्नसिप अनि राजदूतको आवेदनसम्मका बुँदा राखिएको छ ।

अरब देशले राष्ट्रिय पर्वको समयमा क्षमादानदेखि नियमित हुँदै आएको यदुनाथ खनाल लेक्चर सिरिज, कूटनीतिक ओहोदाको प्रमाणपत्र प्रदान आदि सामान्य कुरालाई पनि मन्त्रालयले ‘सफलताका’ अंग भनेको छ । तर, ३५ बुँदामा केही गम्भीर कुरा पनि छन् । जस्तो; पश्चिम एसियामा इरानमाथि अमेरिका र इजरायलले आक्रमण गरेपछिको परिस्थितिमा गरिएको आकस्मिक उडान, २५ जेठमा बेलायती रक्षामन्त्रीसँग गोर्खा सैनिकबारेमा गरिएको कुराकानी आदि पर्छन् ।