रोमानिया पठाउने बहानामा म्यानपावरको ‘संगठित ठगी धन्दा’

विराटनगर : वैदेशिक रोजगारीको आकर्षक गन्तव्य रोमानियाको झुटो सपना देखाएर झापा र मोरङका युवाहरुसँग लाखौं रुपैयाँ असुली गरिएको संगठित ठगी प्रकरण सार्वजनिक भएको छ ।

म्यानपावर कम्पनीमार्फत कामदार पठाउने नाममा लामो समयदेखि चलिरहेको धन्दाको मुख्य आरोपीका रूपमा मोरङ रतुवामाई नगरपालिका–८ का उद्धव पाठक पक्राउ परेपछि घटनाको विस्तृत स्वरूप उजागर भएको हो । प्रहरीका अनुसार पाठकद्वारा रतुवामाई–८ दाम्राभिट्टामा सञ्चालित ‘केएसए’ नामक म्यानपावरमार्फत रोमानिया पठाउने आश्वासन दिएर कम्तीमा १५० भन्दा धेरै युवाबाट करिब ३ करोड ५० लाख रुपैयाँभन्दा बढी रकम ठगी गरिएको प्रारम्भिक अनुसन्धानबाट देखिएको छ ।