अहिलेको समयमा मौद्रिक नीति खुकुलो हुनुपर्छ, अब ढिलाइ गर्नुहुन्न : अर्थमन्त्री डा. महत

नेपाली पैसा

काठमाडौं : अर्थमन्त्री डा. प्रकाशशरण महतले अर्थतन्त्रमा आएको शिथिलता नै देशका लागि मूल समस्या भएको बताएका छन् । आगामी आर्थिक वर्ष २०८०÷०८१ को बजेट एवम् राजस्व नीति तर्जुमाबारे कोशी प्रदेशस्तरीय कार्यक्रममा बोल्दै उनले यस्तो बताएका  हुन् ।  कार्यक्रममा बोल्दै मन्त्री महतले अर्थतन्त्रको दुईवटा महत्वपूर्ण नीतिगत पाटोमध्ये एक मौद्रिक नीतिलाई एउटा परिवेशमा राष्ट्र बैंकले कसिकसाउ राखेको स्मरण गर्दै उनले वित्तीय नीतिले पनि केही समस्या ल्याएको बताए ।

मौद्रिक नीति कति कसिकसाउ गर्नुपर्ने पर्दथ्यो, कति गर्नु हुँदैन थियो त्यो अर्को विषय हो, मन्त्री डा. महतले भने, ‘मलाई लाग्छ, त्यसलाई अहिले खुकुलो गर्नु जरुरी छ । यो कुरा मैले राष्ट्र बैंकको नेतृत्वलाई भनेको छु । नेतृत्वले यसलाई गम्भीरताका साथ लिएको र चाँडै एउटा निर्णयमा पुग्ने विश्वास दिलाएको छ, म पर्खेर बसेको छु ।