निर्माण व्यवसायी र सरकारबिच टकराब : निर्माण रोकिएका ठेक्का तोड्न सचिवको निर्देशन

काठमाडौँ । लामो समयदेखि अलपत्र अवस्थामा रहेका निर्माण आयोजनाहरूको ठेक्का तत्काल तोड्न पूर्वाधार विकास मन्त्रालयले निर्देशन दिएपछि सरकार र निर्माण व्यवसायीबिच तीव्र टकराव उत्पन्न भएको छ । निर्माण सामग्रीमा भएको अत्यधिक मूल्यवृद्धिका कारण काम ठप्प पारेका व्यवसायीहरूले मन्त्रालयको कदमको कडा प्रतिवाद गर्दै राज्यले आफूहरूलाई ‘अपराधी’ सरह व्यवहार गरेको आरोप लगाएका छन् ।

मूल्य समायोजनको सट्टा सरकारले उल्टै कारबाहीको डण्डा चलाउन खोजेको भन्दै व्यवसायीले सशक्त आन्दोलनको चेतावनी दिएपछि देशभरका पूर्वाधार आयोजनाहरू थप अनिश्चित बन्ने देखिएको छ ।