सीमित स्रोत र असीमित सपना बोकेर एसियाडमा नेपाली स्क्वास

चारैतिर पारदर्शी काँचका पर्खालहरू, तीव्र गतिमा ठोक्किएर फर्कने सानो रबरको बल र प्रत्येक सेकेन्ड श्वास फेर्नै धौ–धौ पर्ने उच्च गतिको शारीरिक–मानसिक घम्साघम्सी । स्क्वास खेलको यो कोर्टभित्रको दृश्य केवल एउटा खेलमात्र होइन, अभावका विशाल पर्खालहरूका बिच छातीमा रातो र नीलो झण्डा टाँसेर देशको गौरवका लागि लड्ने नेपाली खेलाडीहरूको अदम्य साहस र आत्मसम्मानको वृतान्त पनि हो । नेपाल स्क्वास ¥याकेट्स संघ (एनएसआरए) को नेतृत्वमा नेपाली स्क्वास टोली एसियाली खेलकुदको विशाल मञ्चमा आफ्नो बलियो उपस्थिति जनाउन पुनः तयार छ । पूर्वाधारको अभाव, राज्यको न्यून बजेट र नगण्य अन्तर्राष्ट्रिय अनुभवका बाबजुद विश्वस्तरीय महाशक्ति राष्ट्रहरूसँग भिड्न उत्रिने यो नेपाली टोलीको यात्रा कुनै ऐतिहासिक उपलब्धिभन्दा कम छैन ।

नेपालमा सन् १९७७ मा भित्रिएको र करिब चार दशकअघि आधिकारिक संघ स्थापना भएको स्क्वासले सन् २०१८ को जाकर्ता–पालेम्बाङ एसियाडबाट एसियाली महाकुम्भमा प्रवेश गरेको थियो । चार पुरुष खेलाडीको टोलीबाट सुरु भएको त्यो पहिलो यात्रा अन्तर्राष्ट्रिय एक्सपोजर र आत्मविश्वासको जग बन्यो । सन् २०२३ को १९औँ हाङजाउ एसियाडसम्म पुग्दा अमृत थापा मगर, अरहन्त केशर सिंह र अमिर भ्लोनजस्ता खेलाडीहरूले भारतजस्ता स्क्वासका विश्वविख्यात हस्तीहरूसँग कोर्टमा सीधा प्रतिस्पर्धाको स्वाद चाखे । प्राविधिक तथ्यांकमा पराजयको नतिजा ३–० देखिए पनि, त्यसले नेपाली खेलाडीहरूको छातीभित्र अन्तर्राष्ट्रिय स्तरको उच्च मनोबल र जितको नयाँ भोक जगाइदिएको थियो । त्यसै अनुभवको जगमा उभिएर आगामी २० औँ एसियाली खेलकुदका लागि भने नेपालले आफ्नो रणनीतिलाई अझ तिखार्दै अरहन्त केशर सिंह र विपना ब्लोनलाई ‘मिक्स डबल्स’ को विशेष रणनीतिक इभेन्टमा उतार्ने अभूतपूर्व तयारी गरिरहेको छ ।