रुसी आक्रमणमा किभमा सात जनाको मृत्यु

किभ । सोमबार बिहान युक्रेनको राजधानी किभमा रुसले क्षेप्यास्त्र र ड्रोनमार्फत गरेको आक्रमणमा कम्तीमा सात जनाको मृत्यु भएको छ । यी आक्रमणमा अरु २४ जना घाइते भएको अन्तरराष्ट्रिय समाचार संस्था रोयटर्सले बताएको छ ।

आक्रमणका कारण अपार्टमेन्ट भवनहरू तथा अन्य संरचनामा व्यापक क्षति पुगेको छ । किभ सहरको सैन्य प्रशासनका प्रमुख टिमुर ट्काचेन्कोका अनुसार आक्रमणबाट ऐतिहासिक पोडिल्स्की जिल्लामा गम्भीर रूपमा क्षतिग्रस्त भएको एउटा अपार्टमेन्ट भवनबाट दुई जनाको शव निकालिएको छ । उक्त जिल्लामा मात्रै चार वटा आवासीय भवनमा आक्रमण भएको उनले टेलिग्राममार्फत जानकारी दिएका छन् ।