प्रधानाध्यापक नियुक्तिको नयाँ योग्यता तोकियो, अब स्थानीय सरकारले सोझै नियुक्ति गर्ने!

काठमाडौं । नेपाल सरकार मन्त्रिपरिषद् बैठकले शुक्रबार पारित गरेको संशोधित शिक्षा नियमावलीले विद्यालयको प्रधानाध्यापक नियुक्ति प्रक्रिया र योग्यता तोकेको छ । प्रधानाध्यापक नियुक्तिको जिम्मेवारी स्थानीय तहलाई दिइएको छ । यसअघि प्रधानाध्यापक विद्यालय व्यवस्थापन समितिमार्फत नियुक्त हुने व्यवस्था थियो । अब प्रधानाध्यापक बन्न आधारभूत तहमा स्नातक र माध्यमिक तहका लागि स्नातकोत्तर उत्तीर्ण स्थायी शिक्षक हुनुपर्नेछ । यसअघि ज्येष्ठताका आधारमा पनि प्रधानाध्यापक नियुक्त हुने सक्ने नियम थियो ।

प्रधानाध्यापकले पाउने भत्ता वृद्धि गरी १ हजारदेखि ३ हजार रुपैयाँसम्म पुर्‍याइएको छ । यसअघि मावि, निमावि र प्रावि तहका प्रअले क्रमशः ५ सय, ३ सय र २ सय मासिक भत्ता पाउँदै आएका थिए । अब मावि तहका प्रधानाध्यापकले ३ हजार, आधारभूत कक्षा ८ सम्मकाले २ हजार र आधारभूत कक्षा ५ सम्मका प्रधानाध्यापकले मासिक १ हजार भत्ता पाउनेछन् ।