तनहुँका विद्यालयमा कृषि शिक्षा अभियान सुरु

दक्ष कृषि जनशक्ति उत्पादन गरी युवा पुस्तालाई स्वदेशमै रोक्ने र उद्यमशील बनाउने उद्देश्यका साथ तनहुँमा विद्यालय केन्द्रित कृषि सचेतना अभियान सुरु गरिएको छ । नेपालभित्रै कृषि क्षेत्रमा रोजगारी र व्यवसायको प्रचुर अवसर रहेको सन्देश दिँदै जिल्ला कृषि विकास कार्यालय तनहुँले विद्यालय तहदेखि नै अभियान थालेको हो ।

अभियानको पहिलो चरणअन्तर्गत तनहुँको भिमाद नगरपालिका भिमाद बजारस्थित जनज्योति माध्यमिक विद्यालयका विद्यार्थीहरूका लागि ‘नेपालमा कृषि स्नातकः अवसर र भविष्य’ विषयक सचेतनामूलक कार्यक्रम आयोजना गरिएको छ । कृषि विकास कार्यालयका अनुसार भिमादबाट सुरु भएको यो अभियानलाई क्रमशः जिल्लाका अन्य सबै स्थानीय पालिकाहरूका विद्यालयमा समेत विस्तार गरिनेछ । तर बजेट अभावले गर्दा यस वर्ष तनहुँका दुई विद्यालयमा मात्रै कार्यक्रम गरिने कार्यालयले जनाएको छ ।