सरुवामा प्राथमिकता निर्धारणका नयाँ आधार, महिला शिक्षकलाई विशेष व्यवस्था

काठमाडौँ- सरकारले शिक्षा नियमावली (दशौँ संशोधन), २०८३ मार्फत सामुदायिक विद्यालयका शिक्षकको सरुवा व्यवस्था परिवर्तन गरेको छ। नयाँ व्यवस्थाअनुसार स्थायी नियुक्ति भएको कम्तीमा तीन वर्ष सेवा अवधि पूरा गरेका शिक्षक ले मात्र एक सामुदायिक विद्यालयबाट अर्को सामुदायिक विद्यालयमा सरुवाका लागि आवेदन दिन पाउनेछन्। तर प्राथमिक तहका स्थायी शिक्षकका हकमा यो तीन वर्षे अवधि लागू नहुने व्यवस्था गरिएको छ।

‘स्थायी सेवा अवधि तीन वर्ष पूरा भएको शिक्षकलाई एक सामुदायिक विद्यालयबाट अर्को सामुदायिक विद्यालयमा सरुवा गर्न सकिनेछ। तर उपनियम (११) मा उल्लेखित प्राथमिकतामा पर्ने स्थायी शिक्षकको हकमा यो व्यवस्था लागू हुने छैन।’ नियमावलीमा उल्लेख छ।