'गोल्ड क्वाइनमा प्रधानमन्त्री र मन्त्रिको नाम जोडेर अनलाइन स्क्याम हुँदैछ, तत्काल रोकियोस्'

काठमाडौं । नेकपा (एमाले) की सांसद गंगादेवी श्रेष्ठले नेपालमा अवैध रूपमा सञ्चालन भइरहेको नेटवर्किङ व्यवसाय ‘गोल्ड कोइन’ माथि तत्काल प्रतिबन्ध लगाउन सरकारसँग माग गरेकी छन् । सोमबार प्रतिनिधि सभा बैठकमा बोल्दै सांसद श्रेष्ठले यस्ता प्लेटफर्मका सञ्चालकले प्रधानमन्त्री र मन्त्रीको नाम जोडेर सर्वसाधारणलाई झुक्यानमा पारिरहेको भन्दै सरकारको ध्यानाकर्षण गराएकी हुन् ।

सांसद श्रेष्ठले उक्त नेटवर्किङ व्यवसायले ‘देशका प्रधानमन्त्री र मन्त्रीहरूले आर्जन गरेको स्रोत नखुलेको सम्पत्ति तथा सुन यसै व्यवसायबाट आर्जन गरेको हो’ भनी भ्रम फैलाएर सर्वसाधारणलाई विश्वासमा लिने प्रयास गरिरहेको दाबी गरिन् । उनले भनिन्, “यो व्यापारलाई हाम्रो देशको प्रधानमन्त्री र मन्त्रीहरूको स्रोत नखुलेको सम्पत्ति र सुन यसैबाट कमाएको हो भनेर कन्भिन्स गरेर यो नेटवर्क सञ्चालन भइरहेको छ । यदि यो सत्य हो भने यसलाई वैधानिक बनाएर कोही पनि नठगिने व्यवस्था गरियोस्, होइन भने तत्काल प्रतिबन्ध लगाइयोस् ।”