हुम्ला–बाजुरा सीमा विवाद थप चर्कियो, कर्णाली करिडोर अवरुद्धप्रति आक्रोश

सुर्खेत । हुम्ला र बाजुरा जिल्लाको सीमा क्षेत्रमा उत्पन्न विवाद थप चर्किंदै गएको छ । विवादित क्षेत्रमा अस्थायी प्रहरी चौकी निर्माण, कर्णाली करिडोर अवरुद्ध तथा स्थानीयवासीको आवागमनमा रोक लगाइएको घटनाप्रति हुम्लाका राजनीतिक दल, स्थानीय तहका जनप्रतिनिधि तथा सरोकारवालाले संयुक्त रूपमा आपत्ति जनाएका छन् ।

हुम्लाका सर्केगाड, खार्पुनाथ, सिमकोट र नाम्खा गाउँपालिकासहितका जनप्रतिनिधिहरूले बाजुरा जिल्लाको हिमाली गाउँपालिकाअन्तर्गत धुलाचौर क्षेत्रमा भएको गतिविधिप्रति आपत्ति जनाउँदै उक्त कार्यले दुई जिल्लाबीचको सम्बन्ध थप तनावपूर्ण बनाएको बताएका छन् ।