एयर फ्रान्स र एयरबस २००९ को विमान दुर्घटनामा दोषी ठहर

पेरिस । फ्रान्सेली विमान सेवा प्रदायक कम्पनी एयर फ्रान्स र एयरबसलाई सन् २००९ मा भएको भयानक विमान दुर्घटनासम्बन्धी मुद्दामा फ्रान्सको अपिल अदालतले हत्याको दोषी ठहर गरेको छ । २२८ जनाको ज्यान जाने गरी भएको सो दुर्घटनालाई फ्रान्सेली उड्डयन इतिहासकै सबैभन्दा घातक दुर्घटना मानिन्छ ।

पेरिसको अपिल अदालतले एयर फ्रान्स र एयरबसलाई उक्त दुर्घटनाका लागि “पूर्ण रूपमा जिम्मेवार” ठहर गरेको हो । दुर्घटनाग्रस्त उडान एएफ४४७ रियो डी जनेरियोबाट पेरिसतर्फ जाँदै थियो । उडानका क्रममा विमान आँधीबेहरीमा फसेर अटलान्टिक महासागरमा खसेको थियो । यसअघि सन २०२३ अप्रिलमा अदालतले दुवै कम्पनीलाई आरोपबाट सफाइ दिएको थियो । तर आठ सातासम्म चलेको पुनः सुनुवाइपछि बिहीबार अदालतले दुबैलाई दोषी ठहर गरेको हो । एयर फ्रान्स र एयरबसले भने आफूहरू निर्दाेष रहेको दाबी गर्दै फैसला विरुद्ध पुनः अपिल गर्ने बताएका छन् ।