इन्डस्ट्रीकै नेतृत्वमा आईटी कोर्स तयार हुँदै, पहिलो वर्षदेखि नै काम गर्दै सिक्न पाइने

काठमाडौँ । नेपालको सूचना प्रविधि (आईटी) क्षेत्रमा रहेको दक्ष जनशक्तिको अभाव र स्किल ग्यापलाई सम्बोधन गर्न नेपाल एसोसिएसन फर सफ्टवेयर एण्ड आईटी सर्भिसेस कम्पनिज् (नास-आईटी) ले स्नातक तहको नयाँ आईटी पाठ्यक्रम निर्माण सुरु गरेको छ । एकेडेमिया र इन्डस्ट्रीबिचको दूरी घटाउने लक्ष्यका साथ संस्थाले पाठ्यक्रम विकासको काम थालेको हो ।

नेपालमा वार्षिक करिब १० हजार आईटी जनशक्ति स्नातक उत्तीर्ण हुने भए पनि उनीहरूमा उद्योगले खोजेको व्यावहारिक सीपको अभाव देखिने गरेको छ । डिग्री प्राप्त गरेपछि पनि धेरै युवाले कार्यस्थलमा प्रवेश गर्नुअघि पुनः तालिम लिनुपर्ने विद्यमान बाध्यतालाई हटाउन यो पहल चालिएको हो ।