योग्य उपाध्यक्ष नियुक्त नगरे असार २५ देखि सत्याग्रह गर्ने डा. गोविन्द केसीको चेतावनी

काठमाडौं- चिकित्सा शिक्षा सुधारका अभियान्ता प्राडा गोविन्द केसीले चिकित्सा शिक्षा आयोगको उपाध्यक्ष पदमा योग्य, अनुभवी, दक्ष तथा स्वार्थ नबाझिने व्यक्तिलाई तत्काल नियुक्त गर्न सरकारसँग माग गरेका छन्। उनले तोकिएको समयभित्र नियुक्ति नभए असार २५ गतेदेखि विगतका मागसहित सत्याग्रह सुरु गर्ने चेतावनी दिएका छन्।

सोमबार जारी प्रेस विज्ञप्तिमा डा. केसीले सरकारले स्वास्थ्य सेवा र शिक्षालाई सस्तो, सहज र गुणस्तरीय बनाउने प्रतिबद्धता गरे पनि हालका नीति, अभिव्यक्ति र गतिविधिले स्वास्थ्य सेवा तथा चिकित्सा शिक्षा अझ महँगो, गुणस्तरहीन र आम नागरिकको पहुँचभन्दा बाहिर पुग्ने जोखिम बढाएको आरोप लगाए।