लिङ्देनलाई अँगालो मारेर अध्यक्ष बनाएको सम्झिँदै धवलले भने- त्यो घर अब मक्किइसक्यो

काठमाडौं । राप्रपा छाडेको घोषणा गर्दै महामन्त्री डा. धवलशम्शेर राणाले पार्टीले स्थानीय तहको चुनावमा उम्मेदवार नपाउने अवस्था बनिसकेपछि विकल्प खोजेको बताएका छन् । आफ्नो नेतृत्वमा १८३ जना नेताहरूले सामूहिक राजीनामा दिएपछि भेलालाई सम्बोधन गर्दै आफूले ५ वर्ष पहिले राजेन्द्र लिङ्देनलाई अँगालो मारेर अध्यक्ष बनाएको स्मरण गरे ।

उनले भने, ‘आज दुःखको साथ हामी आफ्नो घरैबाट छोड्नुपर्ने अवस्था आयो । त्यो खुसीको दिन होइन, आज दुःखको दिन हो। तर आफ्नो जिन्दगीमा, राजनीतिक यात्रामा केही हासिल गर्न आफूले बोकेको मूल्य र मान्यतालाई आफू बसेको घरबाट पार लाग्दैन भन्ने सोचेर हिम्मत गर्नुपर्छ र त्यो घर छोडेर अर्को घर पनि बनाउनुपर्छ । मक्किइसकेको चर्किसकेको घरबाट पार लाग्दैन। अब अर्को बनाउन सक्ने जमर्को गर्नुपर्छ। त्यही जमर्कोमा आज हामीहरू लागेका छौँ ।’