बलियो सरकार, कमजोर नैतिकता र ‘ह्वाटअबाउटिज्म’को दलदल

आज कुनै सार्वजनिक मुद्दा उठ्दा त्यसको जवाफ तथ्य र जिम्मेवारीका आधारमा दिनुको सट्टा प्रतिप्रश्न गरेर पन्छिने प्रवृत्ति बढेको छ । चाहे त्यो प्रधानमन्त्रीले सदनमा दिएको सीमा विवादसम्बन्धी अभिव्यक्ति होस्, अर्थमन्त्री जोडिएको ‘बीवाईडी’ कर छली प्रकरण होस् वा ‘वासिङ मेसिनले चोख्याएको’ भनिएको गृहमन्त्रीको अस्वाभाविक सम्पत्ति प्रकरण नै किन नहोस्, यी सबैमा यस्तै प्रवृत्ति देखिन्छ ।

राजनीति विज्ञानमा यसलाई ‘ह्वाटअबाउटिज्म” भनिन्छ । यसको सरल अर्थ हो कि आफूमाथि उठेको प्रश्न वा आलोचनाको सिधा उत्तर दिनुको सट्टा अर्को पक्षको गल्ती औँल्याएर विषयान्तर गर्नु अर्थात्, ‘हामीले के गर्‍यौँ ?’ भन्ने प्रश्नको उत्तर दिनुको सट्टा ‘उनीहरूले के गरेका थिए ?’ भन्ने प्रतिप्रश्न खडा गर्नु नै ह्वाटअबाउटिज्म हो ।