श्रम निरीक्षणमा अस्पतालहरूमा न्यूनतम पारिश्रमिक र सामाजिक सुरक्षा कार्यान्वयन कमजोर भेटियो

काठमाडौँ । श्रम तथा रोजगार कार्यालयहरूले देशभर सञ्चालन गरेको श्रम निरीक्षणमा सरकारी तथा निजी अस्पतालहरूमा श्रम ऐन कार्यान्वयनको अवस्था सन्तोषजनक नरहेको पाइएको छ। निरीक्षणका क्रममा न्यूनतम पारिश्रमिक, श्रम सम्झौता तथा सामाजिक सुरक्षा कार्यक्रम कार्यान्वयनमा उल्लेखनीय कमजोरी देखिएको हो।

असार १८ गते एकै दिन १५ वटा अस्पतालमा गरिएको निरीक्षणसहित पछिल्ला केही दिनमा देशभरका ९५ सरकारी तथा निजी अस्पताल तथा स्वास्थ्य संस्थाको अनुगमन गर्दा श्रमिकका आधारभूत अधिकारसँग सम्बन्धित विभिन्न प्रावधान पूर्ण रूपमा पालना नभएको श्रम कार्यालयहरूको निष्कर्ष छ। झापा, विराटनगर, जनकपुर, वीरगन्ज, काठमाडौँ, पोखरा, बुटवल, नेपालगन्ज, सुर्खेत र धनगढीलगायतका क्षेत्रमा गरिएको निरीक्षणमा श्रम कानुन कार्यान्वयनमा कमजोरी भेटिएको जनाइएको छ।