बाढी पीडितलाई अपमान गरी भिडियो बनाउने एकजना युवक पक्राउ

भोटेकोशीमा आएको भीषण बाढीप्रति खुसी व्यक्त गर्दै पीडितहरूलाई अपमानित गर्ने भिडियो सामाजिक सञ्जालमा पोष्ट गरेको आरोपमा एक युवक पक्राउ परेका छन्। पक्राउ पर्नेमा बैतडीको सुर्नया गाउँपालिका-७ घर भई हाल काठमाडौंको चन्द्रागिरी नगरपालिका-१२ बलम्बु बस्दै आएका २४ वर्षीय बिरेन्द्र मडै रहेका छन्।

उनलाई भदौ १० गते आएको बाढीबाट भएको जनधनको क्षतिको सम्बन्धमा विभिन्न जात जातिलाई लक्षित गरी होच्याउने, अपमानित गर्ने तथा उक्त विपत्तिमा खुशी व्यक्त गर्दै भिडियो बनाएर सामाजिक सञ्जालमा प्रशारण गरेको आरोपमा पक्राउ गरिएको हो । साइबर ब्यूरोले प्राविधिक विश्लेषण तथा अनुसन्धान गरी उनलाई भदौ २० गते पक्राउ गरेको हो। पक्राउ परेका उनलाई जिल्ला अदालत काठमाडौंबाट विद्युतीय (इलेक्ट्रोनिक) कारोबार ऐन, २०६३ अन्तर्गतको कसूरमा म्याद थप गरी अनुसन्धान भइरहेको ब्यूरोले जानकारी दिएको छ।