अविरल वर्षाले सुदूरपश्चिमका राजमार्ग तथा सडकखण्ड अस्तव्यस्त

धनगढी । आइतबारदेखिको अविरल वर्षासँगै विभिन्न स्थानमा पहिरो, नदी कटान तथा खोलामा पानीको सतह बढेपछि सुदूरपश्चिम प्रदेशका प्रमुख राजमार्ग तथा सडकखण्डको यातायात प्रभावित भएको छ । प्रदेशका विभिन्न जिल्लामा सडक अवरुद्ध हुनुका साथै कतिपय सडकखण्डमा एकतर्फी तथा जोखिमपूर्ण रूपमा यातायात सञ्चालन भइरहेको छ ।

सुदूरपश्चिम प्रदेश प्रहरी कार्यालय धनगढीले सार्वजनिक गरेको विवरणअनुसार कञ्चनपुर, बैतडी, बझाङ, बाजुरा, डडेल्धुरा र कैलालीका विभिन्न सडकखण्डमा वर्षाका कारण समस्या देखिएको छ । कञ्चनपुरको भीमदत्त नगरपालिका–९, खल्ला मस्टेटीस्थित महाकाली करिडोरमा भीषण पहिरो खसेपछि सडक पूर्ण रूपमा अवरुद्ध भएको छ ।