नेपाली बजारमा यो साता सुनको मूल्य प्रतितोला ३ लाख रुपैयाँ नाघेपछि सुनचाँदी व्यवसायीहरूले सुनका गरगहना आमनेपालीको क्रयक्षमताभन्दा बाहिर पुगेको टिप्पणी गरेका छन्।

भलै बुधवारको तुलनामा बिहीवार उक्त मूल्य थोरैले घटेर प्रतितोला २,९२,२०० रुपैयाँमा झर्‍यो। माघको पहिलो दिन सुनको मूल्य तोलाको २,७६,५०० थियो।

"अहिले सुनको कारोबार त खासै छैन। एक हिसाबले सुनको मूल्य नेपालीको क्रयशक्तिभन्दा माथि गएको महसुस भएको छ," सुनचाँदी व्यवसायी महासङ्घका वरिष्ठ उपाध्यक्ष दियेशरत्न शाक्यले बीबीसीसँग भने, "मानिसहरू सुन बेच्न आइरहेका छन्, किन्न आइरहेका छैनन्।"

"सुनचाँदी व्यवसायीहरूले अहिलेसम्मचाहिँ किनिरहेकै छन् तर मूल्य अझै माथि भयो भने (हामीलाई पनि) गाह्रो हुन्छ।"

सुनको भाउ घटबढ किन र कसरी हुन्छ?

सुनको मूल्य बढेको बढ्यै, मानिसहरू यो धातुप्रति किन हुरुक्क हुन्छन्

नेपाल राष्ट्र ब्याङ्कका पूर्व कार्यकारी निर्देशक नरबहादुर थापाका अनुसार अमेरिकी व्यापार नीतिमा आएको परिवर्तन र विश्वका विभिन्न क्षेत्रमा देखिएका द्वन्द्वका कारण सुनको मूल्यमा यो अवस्था देखा परेको हो। "यो अवस्था कम्तीमा तीन वर्ष कायम रहन सक्ने देखिन्छ," उनले भने।

नेपालमा सुनको मूल्य अन्तर्राष्ट्रिय बजारअनुसार तलमाथि हुने गर्छ। सुनका गरगहनामा गरिने लगानीलाई सामान्यतः सुरक्षित मानिन्छ। अन्यत्रजस्तै नेपालमा पनि सम्पत्तिको एउटा उपकरणका रूपमा यसको कारोबार हुँदै आएको छ।

त्रिभुवन विश्वविद्यालयको केन्द्रीय अर्थशास्त्र विभागका प्रमुख प्राध्यापक रामप्रसाद ज्ञवाली सुनको मूल्य केही समय अगावैदेखि न्यून तथा मध्यम आय भएका वर्गको पहुँचबाहिर रहँदै आएको बताउँछन्।

"सक्नेले चाहिँ किनिरहेकै हुनुपर्छ।"

यद्यपि सुनको मूल्य निरन्तर बढिरहेको अवस्थामा नेपालीहरूका लागि अन्य सुरक्षित लगानीका विकल्पहरू सीमित रहेकोमा थापा र ज्ञवाली दुवै एकमत सुनिए।

विकल्पमा चाँदी

सुनचाँदी व्यवसायी शाक्यका अनुसार मूल्य बढेसँगै सुनको कारोबारमा उल्लेख्य कमी आए पनि चाँदीको किनबेच भने यथावत् छ।

नेपाली बजारमा चाँदी बिहीवार प्रतितोला ५,८७० रुपैयाँमा कारोबार भयो। माघ महिनाको पहिलो दिन यसको प्रतितोला मूल्य ५,४८५ रुपैयाँ थियो। शुक्रवार चाँदीको मूल्य ६ हजार १९० रुपैयाँ रहेको नेपाल सुन चाँदी व्यवसायी महासंघले जनाएको छ।

"चाँदी किन्न आउनेहरू छन्, यसको मूल्य नेपालीको क्रयक्षमताभित्रै पनि छ," चाँदीमाथिको लगानीलाई सुरक्षित ठानिनुपछिको कारणबारे उनी भन्छन्, "विश्वव्यापी रूपमा चाँदीको औद्योगिक माग निकै उच्च छ र मागअनुसारको आपूर्ति भइरहेको छैन।"

"नेपालमा पनि चाँदीको माग छ तर सामानको नभइ ढिक्का वा बारको माग हुने गरेको छ।"

सुनको भाउले आकाश छोएपछि संस्कार र स्वभावमा परिवर्तन आइरहेको हो?

अमेरिकाले ब्याज घटाउँदा नेपालमा सुनको भाउ किन बढ्छ

"इलेक्ट्रिक सवारी साधनका ब्याट्रीमा यसको उपयोगलाई लिएर विभिन्न किसिमका परीक्षणहरू भइरहेका छन्। त्यसमा चाँदीको खाँचो बढ्यो भने माग पनि बढ्न सक्छ।"

"अन्यत्रतिर 'पेपर गोल्ड'को चलन पनि छ तर नेपालमा त्यसको कारोबारका निम्ति कुनै कानुनी व्यवस्था छैन," उनले भने।

'पेपर गोल्ड'ले भौतिक सुन नभइ सुनको मूल्यसँग जोडिएका वित्तीय साधनहरूलाई जनाउँछ।

विकल्पमा समस्या

नेपाल राष्ट्र ब्याङ्कका पूर्व कार्यकारी निर्देशक थापाका नेपाली लगानीकर्ताहरू यतिबेला सुरक्षित लगानीका क्षेत्रका हिसाबले विकल्पहीन देखिएका टिप्पणी गर्छन्।

"ब्याङ्कमा राख्दा ब्याजदर दुई प्रतिशतको हाराहारीमा छ। घरजग्गा मूल्यका कारणले पहुँचभन्दाबाहिर गयो। शेयरबजारको धरातल त्यति बलियो छैन किनकी ब्याङ्क तथा वित्तीय संस्थाहरूले पहिले झैँ लाभांश दिन सक्ने स्थिति छैन," उनले भने, "नेपालीहरूले विकल्प खोजिरहेका छन् तर पाइरहेका छैनन्।"

सुनमा 'पाइलैपिच्छे' लाग्ने करमा व्यवसायीको असन्तुष्टि, उपभोक्तालाई पर्ने अतिरिक्त भारको लेखाजोखा

पृथ्वीका खानीमा अब कति सुन बाँकी छ?

प्राध्यापक ज्ञवाली पनि केही समययता नेपालमा सानाठूला सबै प्रकारका लगानीकर्ताहरू समस्यामा रहेका विचार व्यक्त गर्छन्।

"जेन जी आन्दोलनपछि नेपालको राजनीतिक वातावरण अनिश्चित जस्तो छ र मानिसहरू लगानी गर्न डराइरहेका छन्। ब्याङ्कहरूमै ऋण लगानीयोग्य अर्बौँ रकम जम्मा भएर बसेको छ।"

"धेरथोर लगानी गर्न सक्नेहरूलाई लगानीका सबै क्षेत्रको ज्ञान हुने कुरा पनि भएन र हरेकमा केही न केही निहित जोखिम पनि हुने नै भए," ज्ञवालीले भने, "सुनमा गरिने लगानी सबैभन्दा सुरक्षित हो तर गहना किन्दा जर्ति काट्ने भएकाले बेच्दा फाइदा हुँदैन। सिक्का हुन्थ्यो भने सतप्रतिशत त्यहीँ रहन्थ्यो र बजार मूल्यअनुरूप बिक्थ्यो। गहना बेच्दा १५/२० प्रतिशत नै घटेर बेच्नु पर्ने हुन्छ।"

सुनचाँदी व्यवसायी शाक्यका अनुसार सुनका हकमा नेपालमा उपभोक्तालाई ढिक्का नभइ तयारी गरगहना मात्रै बिक्री गर्ने गरिन्छ।

विज्ञले सुझाएका उपाय

नेपाल राष्ट्र ब्याङ्कका पूर्व कार्यकारी निर्देशक थापा ब्याङ्क तथा वित्तीय उपकरणमा गरिने लगानी यतिबेला तुलनात्मक रूपमा सुरक्षित हुने धारणा राख्छन्।

"केन्द्रीय ब्याङ्क छ र त्यसले बाणिज्य ब्याङ्कहरूलाई डुब्न दिँदैन। हिजोको जस्तो प्रतिफल आउने अवस्था त छैन, तथापि अन्य क्षेत्रमध्ये ब्याङ्किङ क्षेत्र सुरक्षित नै छ।"

प्राध्यापक ज्ञवाली भने ऐतिहासिक रूपमै ब्याजदर तल झरेको यो अवस्थामा ब्याङ्कमा लगानी गर्ने कुरालाई त्यति आकर्षक ठान्दैनन्।

"भारतमा भन्दा पनि न्यून ब्याजदर भएको स्थिति छ र पुँजी पलायनको जोखिम समेत त्यत्तिकै छ। कसरी निकास हुन्छ चुनौतीकै विषय छ।"

अस्ट्रेलियामा लाखौँ डलर पर्ने सुन भएका चट्टान

नेपालमा कुनकुन गुणस्तरको सुन आउँछ, किन्दा केमा ध्यान दिने?

थोरै पुँजी भएकाहरूले व्यवसाय आदिमा लगानी गर्दा उचित हुन सक्ने प्राध्यापक ज्ञवाली बताउँछन्।

"कि व्यापारमा लगाउनुपर्‍यो या उद्यमशीलतामा जानुपर्‍यो। व्यवसाय गर्ने र (त्यसबाट) कमाउने गर्नुपर्‍यो।"

पूर्वब्याङ्कर थापा राज्यले पनि पुँजीनिर्माणतर्फ जोड दिएको नदेखिएकाले लगानीकर्ताहरूले विकल्प नपाएका बताउँछन्।

"जलविद्युतलगायतका लाभदायक क्षेत्रका धेरै कामहरू सरकारी संयन्त्रभित्रकै विभिन्न व्यावधानका कारण अवरुद्ध भएका छन् भने कतिपय स्थानमा नीतिगत अस्पष्टताले समस्या सिर्जना गरेको छ," उनी भन्छन्।

"जबसम्म सरकारले निर्यातको सम्भावना भएका र आयात प्रतिस्थापन गर्न सक्ने जलविद्युत तथा पूर्वाधारजस्ता तुलनात्मक लाभका क्षेत्रमा आफै अग्रसर भई लगानी गर्दैन, ब्याङ्क तथा वित्तीय संस्थाहरूमा थुप्रिएको लगानीयोग्य पूँजी परिचालन गर्ने स्पष्ट व्यवस्था गर्दैन, तबसम्म यस्तो अवस्था कायमै रहन्छ।"

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।